Peticion pa derecho di voto pa Arubianonan bibando pafo di Aruba

Entrante e aña aki Arubianonan na Aruba por vota pa Parlamento Europeo. Un bon desaroyo democratico. Pero pa Arubianonan bibando pafo di Aruba lastimamente no ta posibel (ainda) actualmente pa vota pa Parlamento di Aruba! Segun peticionario Pierre Simon ta hopi straño cu den un pais democratico manera Aruba e grupo grandi di Arubianonan bibando den exterior, mirando nan conocimento y experencia adkiri, no por vota pa Staten di Aruba. Sigur teniendo cuenta cu e hecho cu Hulandesnan bibando na Aruba si por vota pa Tweede Kamer na Hulanda. Pa e motibo ey a wordo lansa un peticion online pa sostene e derecho di voto pa Arubianonan bibando pafo di Aruba. E motibo principal segun e peticionarionan cu tur Arubiano mester haña e mesun derecho di voto ta cu e derecho di voto lo engrandese e compromiso (politico) cu tur Arubiano bibando den exterior tin pa Aruba. Esaki lo por tin como consecuencia cu graduadonan of otro Arubianonan bibando den exterior lo sinti nan mes mas obliga di regresa Aruba bek pa yuda nos pais sigui bai dilanti. Un invitacion ta bai pesey na tur Arubiano na Aruba y den exterior pa haci uso di e posibilidad aki y firma e peticion online atraves di e link menciona abou. http://kiesrechtvoorarubanen.petities.nl