Animo grandi pa derecho di voto pa Arubianonan den exterior

Den e prome luna di e peticion ya caba tin mas di 200 firma a drenta pa apoya e causa pa Arubianonan bibando den exterior haña e mesun derecho di voto. Tin firmanan di Arubianonan na tur parti mundo incluyendo Aruba, Hulanda, Merca y te hasta Suiza (Zwitserland). E motibo principal segun e peticionarionan cu tur Arubiano mester haña e mesun derecho di voto ta cu e derecho di voto lo engrandece e compromiso (politico) cu tur Arubiano bibando den exterior tin pa Aruba. Esaki lo por tin como consecuencia positive cu graduadonan of otro Arubianonan bibando den exterior mas lihe lo sinti nan mes obliga di regresa Aruba bek pa yuda nos pais sigui bai dilanti. Tambe ta asina tambe cu ya na 1985 caba, durante e creacion di nos constitucion (Staatsregeling), e legislador Arubiano a duna di conoce cu ta imaginabel pa duna Hulandesnan naci na Aruba, y bibando den exterior, e derecho di voto. Pa mas informacion por mira e splicacion di articulo III.5 di e Constitucion di Aruba. Na Hulanda e posibilidad aki ademas ta existi caba desde comienso di ananan ’90 di siglo pasa. Teniendo cuenta cu e hechonan aki, e globalisacion actual y e desaroyonan democratico mundialmente, e peticionarionnan ta haña hopi straño y hasta 'unfair' cu den un pais moderno manera Aruba un grupo di Arubianonan bibando den exterior ta wordo rechasa pa laga nan voz wordo scucha den e forma di votacion activo pa Parlamento di Aruba. Un invitacion ta bai pesey na tur Arubiano na Aruba y den exterior pa haci uso di e posibilidad aki y firma e peticion online atraves di e link menciona abou. http://kiesrechtvoorarubanen.petities.nl